Genesỳ
Toko faha-44
1 Avy eo i Josefa dia nandidy ny mpikarakara ny ao an-tranony hoe: -Fenoy hanina araka izay zakany ny kitapon'ireo lehilahy ireo, dia apetraho ao am-bavan-kitapon'ny tsirairay avy koa ny volany.2 Apetraho eo am-bava-kitapon'ilay faralahy koa ny tsangambavako volafotsy mbamin'ny vola hividianany vary. Dia notanterahiny tokoa izay nandidian'i Josefa azy.
3 Nony ampitso vao mangiran-dratsy, dia navela handeha ireo lehilahy ireo mbamin'ny borikiny.
4 Ary rehefa nivoaka ny tanana izy, ka tsy mbola lasa lavitra akory, dia hoy i Josefa tamin'ilay mpikarakara ny ao an-tranony: -Ndeha, enjeho ireny lehilahy ireny, ary tratraro ka anontanio hoe: Nahoana ianareo no mamaly ratsy ny soa?
5 Nahoana no nangalarinareo ny tsangambava izay fisotroan'ny tompoko sy fanaovany sikidy? Ratsy izao nataonareo izao!
6 Dia nahatratra ireo rahalahin'i Josefa ralehilahy ka namerina taminy ireo teny ireo.
7 Ary namaly izy mirahalahy avy ka nanao hoe: -Ahoana no ahazoanao miampanga anay toy izany, tompoko? Tsy ho sahy nanao izany zavatra izany na oviana na oviana izahay mpanomponao!
8 Fa ny vola izay hitanay tao am-bavan'ny kitapom-bary aza nentinay niverina avy any Kanahana ho aty aminao. Koa ahoana no hangalaranay izay volafotsy na volamena avy ao an-tranon'ny tomponao?
9 Koa izay ahitana izany aminay mpanomponao dia hatao maty; ary izahay kosa handevozinao, tompoko.
10 Ka hoy ralehilahy: -Eny ary, fa hotanako amin'ny teninareo ianareo; kanefa izay ahitana ny tsangambava ihany no ho tonga andevoko, fa ny sisa kosa dia ho afaka.
11 Samy nampidina faingana ny kitapony tamin'ny tany avy izy ireo ary samy nanokatra ny azy.
12 Nosavain-dralehilahy avokoa ny kitapo rehetra nanomboka tamin'ny lehibe indrindra ka hatramin'ny kely indrindra, ka tao amin'ny kitapon'i Benjamina no nahitana ilay tsangambava.
13 Samy nandriatra ny fitafiany izy ary samy namatratra ny entany teny amin'ny borikiny avy, dia niverina ho ao an-tanana.
14 Tonga tao an-tranon'i Josefa i Joda sy ireo rahalahiny, fa mbola tratra tao izy. Dia niankohoka tamin'ny tany teo anatrehany izy ireo.
15 Ary hoy i Josefa taminy: -Ahoana no nanaovanareo izao zavatra izao? Tsy fantatrareo angaha fa ny lehilahy toa ahy izao dia mahay mamanta-javatra?
16 Dia namaly i Joda hoe: -Inona moa, tompoko, no holazainay anao? Inona no ho azonay lazaina mba hampiseho ny fahamarinanay? Andriamanitra no nahita ny fahadisoan'ny mpanomponao: indreto ary izahay, tompoko, manaiky ho andevonao miaraka amin'ilay nahitana ny tsangambava.
17 Hoy kosa i Josefa hoe: -Tsia, sanatria ahy ny hanao izany! Ny olona izay nahitana ny tsangambava ihany no ho andevoko; ianareo kosa modia soa aman-tsara any amin'ny rainareo.
18 Fa nanatona azy i Joda ka nanao hoe: -Tompokolahy o, ianao no mitovy amin'ny Farao. Koa azafady, tompoko, raha mba hiteny kely aminao aho ary aoka tsy ho tezitra ianao.
19 Ianao, tompoko, dia nanontany anay mpanomponao raha mbola manan-dray na rahalahy izahay.
20 Dia namaly izahay hoe: Mbola manan-dray efa antitra izahay ary koa ny zandrinay faralahy izay zanaky ny fahanterany. Tian-drainay fatratra izy, satria izy sisa no hany navelan'ny reniny fa ny rahalahiny dia efa maty.
21 Dia nilaza taminay ianao hoe: Ento aty amiko izy, fa tiako ho hita.
22 Nanazava taminao izahay, tompoko, fa tsy afaka mandao an-drainy ny zaza; fa raha ilaozany ny rainy, dia ho faty.
23 Kanefa nilaza taminay ianao fa tsy handray anay intsony, raha tsy tonga miaraka aminay ny zandrinay faralahy.
24 Dia niverina tany amin'i dada mpanomponao ary izahay, tompoko, ka nitatitra taminy ny teninao.
25 Koa rehefa nilaza taminay ny rainay mba hiverina hividy sakafo,
26 dia nitenenanay hoe: Tsy afaka mankany izahay, raha tsy miaraka aminay ny zandrinay faralahy; fa raha tsy midina miaraka aminay izy, dia tsy afaka handray anay ilay tompon'ny tany.
27 Dia hoy i dada mpanomponao hoe: Fantatrareo tsara fa roa lahy ihany no zanakay sy i Rahely vadiko.
28 Ny anankiray dia niala teto amiko; ary heveriko fa lanin'ny bibidia tokoa izy, satria tsy hitako intsony mandraka androany.
29 Kanefa dia tadiavinareo halaina amiko indray ity ny anankiray. Raha hiharan-doza izy, dia ianareo no hahatonga ity tenako efa antitra ity ho difotr'alahelo hankany amin'ny toeran'ny maty.
30 Ary ankehitriny ahoana no hodiako any amin'i dada, kanefa tsy miaraka aminay io zatovo io? Fa ny ain'i dada dia miankina amin'ny ain'io zatovo io;
31 koa rehefa mahita azy tsy tafaverina izy, dia ho faty ka izahay mpanomponao no hahatonga io rainay efa antitra io ho difotr'alahelo hankany amin'ny toeran'ny maty.
32 Izaho mpanomponao no niantoka io zatovo io tamin'ny raiko ka nanao hoe: Raha tsy tafaveriko aminao izy, dia ho meloka amin'i dada mandritra ny androko rehetra aho.
33 Koa ankehitriny miangavy aho, tompoko, aoka ny tenako no hijanona hisolo toerana io zatovo io ho andevonao, fa izy kosa hiakatra hiaraka amin'ireo rahalahiny.
34 Fa tsy afaka hiverina any amin'i dada aho, raha tsy miaraka amin'io zatovo io satria tsy ho zakako ny hahita an'i dada hiharan-doza.