Genesỳ

Toko faha-43

¹ Mbola nanindry mafy tany Kanahana ny mosary.

² Koa rehefa lany avokoa ny vary rehetra nentina avy tany Ejipta, dia hoy i Jakoba tamin'ireo zanany lahy: -Andeha indray ianareo miverina mividy sakafo ho antsika.

³ Fa namaly azy i Joda nanao hoe: -Ilay tompon'ny tany dia nanafatrafatra mafy anay hoe: Tsy handray anareo aho, raha tsy miaraka aminareo ilay rahalahinareo.

⁴ Koa raha alefanao hiaraka aminay i Benjamina, dia handeha hidina hividy sakafo ho anao izahay.

⁵ Fa raha tsy alefanao kosa izy, dia tsy handeha izahay satria ralehilahy io dia nilaza taminay hoe: Tsy handray anareo aho, raha tsy miaraka aminareo ilay rahalahinareo.

⁶ Ary hoy i Jakoba hoe: -Nahoana no dia nampidi-doza ahy ianareo ka nilaza tamin'izany lehilahy izany fa mbola manana rahalahy ianareo? 7 Ka namaly ireo hoe: -Ralehilahy io no namotopototra mafy momba anay sy momba ny fianakavianay, ka nanontany hoe: Mbola velona ve ny rainareo? Mbola manana rahalahy ve ianareo. Ary izahay dia namaly fotsiny ny fanontaniany, fa tsy nampoizinay ny hilazany hoe: Ampidino aty ny rahalahinareo.

⁸ Ary i Joda kosa nanampy hoe: -Avelao, ry Dada, hiaraka amiko io zanakao io; fa tsy maintsy mandeha izahay, raha te ho velona fa tsy ho faty ianao sy ny tenanay ary ny fianakaviantsika.

⁹ Izaho no hiantoka azy ka azonao takina amiko; fa raha tsy haveriko eto anatrehanao izy, dia ho meloka aminao mandritra ny androko rehetra aho.

¹⁰ Ary ankehitriny raha tsy nitaredretra izahay, dia efa tafaverina fanindroany toy izay.

¹¹ Ka hoy i Jakoba tamin'ireo zanany: -Raha izany ary, dia izao no ataovy: Mitondra an-kitaponareo zavatra tsara vokatry ny tany mba hataonareo fanomezana ho an'ilay Ejiptianina. Mitondra zava-manitra isan-karazany: menaka manitra, ladana, tantely, voam-boatavo, ary amandy.

¹² Mitondra vola toy ny taloha ary ento koa ireo vola teo am-bavan-kitaponareo, dia avereno aminy fa angamba nisy fahadisoana.

¹³ Dia ento ny rahalahinareo ary miainga ka miverena any amin'izany lehilahy izany.

¹⁴ Andriamanitra Tsitoha anie hahatonga azy hamindra fo aminareo ka hamela an'i Benjamina sy i Simehona hiverina hiaraka aminareo! Fa izao dia tsy homban-janak Andriamanitra Tsitoha anie hahatonga azy hamindra fo aminareo ka hamela an'i Benjamina sy i Simehona hiverina hiaraka aminareo! Fa izao dia tsy homban-janaka aho tahaka ny tsy nanan-janaka mihitsy.

¹⁵ Dia nentin'izy mirahalahy avy ny fanomezana sy ny vola ary koa i Benjamina; dia niainga izy niara-nidina nankany Ejipta, ka niseho teo anatrehan'i Josefa.

¹⁶ Ary rehefa hitan'i Josefa fa niaraka tamin'ireo i Benjamina, dia hoy izy tamin'ny mpikarakara ny ao an-tranony: -Ento any an-trano ireo lehilahy ireo, dia mamonoa zavatra ka manamboara sakafo, fa hiara-mihinana amiko izy ireo anio antoandro.

¹⁷ Notanterahin-dralehilahy ny baikon'i Josefa; ary nentiny tany an-tranon'i Josefa ireo,

¹⁸ dia raiki-tahotra satria naiditra tao ka nifampilaza hoe: Noho ilay vola naverina tao anaty kitapom-barintsika teo aloha izay no nampidirana antsika eto mba hahavoa antsika sy hakany ny borikintsika ary hanandevozany ny tenantsika.

¹⁹ Koa rehefa teo am-baravarana izy ireo, dia nanatona an'ilay mpikarakara ny tao an-tranon'i Josefa ka niresaka taminy hoe:

²⁰ -Aza fady aminao, tompoko! Efa tonga taty indray mandeha izahay teo aloha mba hividy sakafo.

²¹ Nony tonga teo amin'ny toerana handriana hariva anefa izahay ka nanokatra ny kitaponay, dia samy nahita ny vola teo am-bavan-kitaponay avy fa naverina taminay ny vola naloanay. Nentinay niverina aty ireo vola ireo,

²² ary nitondra vola hafa koa izahay mba hividianana sakafo. Tsy fantatray izay namerina ny volanay tao anaty kitaponay.

²³ Ka hoy ny navalin-dralehilahy azy: -Milamina ianareo, ary aza matahotra. Ny Andriamanitrareo, dia Ilay Andriamanitry ny rainareo, no nametraka harena tao an-kitaponareo; fa raha ny amin'ny volanareo dia efa voaraiko tokoa. Dia navoakan-dralehilahy i Simehona,

²⁴ ka nasainy niditra tao an-tranon'i Josefa izy rehetra, ary nomeny rano hanasany tongotra; sady nomeny vilona koa ny borikiny.

²⁵ Nanomana ny fanomezana ireo mandra-piavin'i Josefa tamin'ny antoandro, satria efa reny fa hiara-misakafo aminy eo izy.

²⁶ Vao niditra i Josefa, dia natolotr'ireo azy ny fanomezana sady niankohoka tamin'ny tany teo anatrehany izy.

²⁷ Dia nanontany ny fahasalaman'izy ireo i Josefa, sady nanampy hoe: -Ary mba manao ahoana ilay rainareo efa antitra izay nolazainareo tamiko? Moa mbola velona ihany ve izy?

²⁸ Ka hoy ny navaliny azy: -Salama tsara ilay mpanomponao sady rainay, ary mbola velona izy. Dia niondrika sy niankohoka ireo.

²⁹ Ary nanopy maso i Josefa ka nahita an'i Benjamina rahalahiny izay iray reny aminy, dia nanao hoe: -Io moa izany ilay zandrinareo faralahy nolazainareo tamiko? Ary dia nampian'i Josefa hoe: -Andriamanitra anie hitahy anao, anaka!

³⁰ Feno loatra ny fon'i Josefa nahita ity zandriny ka nitady hitomany izy; dia niala faingana teo izy ka niditra tao amin'ny efitranony ary nitomany tao.

³¹ Rehefa avy nanasa tarehy izy, dia niditra indray. Notsindriany ny fihetseham-pony ary nasainy naroso ny sakafo.

³² Norosoana sakafo mitokana i Josefa, natao mitokana ny an'ireo rahalahiny, ary nihinana mitokana koa ireo Ejiptianina nasaina fa tsy mahazo mihinana miaraka amin'ny Hebreo satria fady izany.

³³ Nipetraka nanoloana an'i Josefa arakara-jokiny ireo rahalahin'i Josefa, manomboka amin'ny lahimatoa ka miafara amin'ny faralahy. Dia nifampijerijery ireo sady gaga.

³⁴ Nasain'i Josefa samy norosoana ny sakafo matsiro avy teo anatrehany izy mirahalahy avy, fa ny an'i Benjamina dia nataony indimy tahaka ny anjaran-drery tamin'ireo zokiny rehetra. Dia nanaram-po nisotro divay niaraka tamin'i Josefa izy ireo.