Genesỳ

Toko faha-42

¹ Fantatr'i Jakoba fa misy vary any Ejipta, ka hoy izy tamin'ireo zanany lahy: -Nahoana no mifampijery fotsiny eto ianareo?

² Indro, reko fa misy vary any Ejipta. Koa andeha midina any mividy vary ho antsika, mba ho velona isika fa tsy ho faty.

³ Dia nidina tany Ejipta ireo zokin'i Josefa folo lahy mba hividy vary.

⁴ Tsy nalefan'i Jakoba niaraka tamin'ireo rahalahiny kosa i Benjamina zandrin'i Josefa, fa hoy izy hoe: Sao misy loza hanjo azy any.

⁵ Dia tonga hividy vary tany Ejipta toy ny hafa ireo zanakalahin'i Jakoba, fa tratry ny mosary koa ny tany Kanahana.

⁶ I Josefa no mpitondra ny tany Ejipta, ka izy no mpivaro-bary tamin'ireo olon'ny tany hafa rehetra. Koa tonga niankohoka tamin'ny tany teo anatrehan'i Josefa ireo rahalahiny.

⁷ Vao hitan'i Josefa ireo rahalahiny, dia fantany; saingy mody niseho ho vahiny taminy kosa i Josefa sady nandrahona azy hoe: -Avy aiza moa ianareo? Hoy kosa ireo hoe: -Avy any amin'ny tany Kanahana izahay. Tonga mba hividy sakafo.

⁸ Koa fantatr'i Josefa ireto rahalahiny, fa izy ireo kosa tsy nahafantatra azy.

⁹ Tsaroan'i Josefa ny nofiny momba azy ireo, ka hoy indray izy hoe: -Mpitsikilo ianareo! Hizaha izay toerana mora hanafihana eto amin'ny tany no nahatongavanareo.

¹⁰ Fa novaliany hoe: -Tsia, tompoko o! Tonga mba hividy sakafo fotsiny izahay mpanomponao.

¹¹ Zanak'olona iray ihany izahay rehetra ireto; olo-marina fa tsy mba mpitsikilo akory izahay mpanomponao.

¹² Ary hoy i Josefa taminy: -Tsia, fa hizaha izay toerana mora hanafihana eto amin'ny tany no nahatongavanareo.

¹³ Namaly kosa ireo hoe: -Misy 12 mirahalahy izahay mpanomponao, zanak'olona iray ihany any amin'ny tany Kanahana; ary indro ny faralahy aminay aza dia nijanona any amin'ny rainay, fa ny iray kosa efa tsy ao intsony.

¹⁴ Hoy indray i Josefa taminy: -Izany indrindra no efa nilazako anareo hoe mpitsikilo ianareo.

¹⁵ Koa izao no fizahan-toetra hatao aminareo: Velona ny Farao, ka mianiana aho fa tsy hiala eto mihitsy ianareo raha tsy tonga eto izany zandrinareo faralahy izany.

¹⁶ Maniraha anankiray aminareo haka azy, fa ianareo sisa kosa dia hatao an-tranomaizina. Ho hita amin'izany ny fahamarinan'ny teninareo. Fa raha tsy izany kosa, velona ny Farao, ka manizinginzina aho fa mpitsikilo tokoa ianareo.

¹⁷ Nataon'i Josefa an-tranomaizina nandritra ny telo andro izy rehetra.

¹⁸ Ary tamin'ny andro fahatelo dia hoy i Josefa taminy: -Izao no ataovy, dia ho velona ianareo, satria izaho koa mba manaja an'Andriamanitra.

¹⁹ Raha olo-marina tokoa ianareo, dia aoka ny anankiray aminareo hijanona ao an-tranomaizina nitazonana anareo; fa ianareo sisa kosa mandehana mitondra ny vary ho any amin'ny fianakavianareo mosarena.

²⁰ Avy eo dia ento aty amiko ny zandrinareo faralahy, amin'izay dia ho voaporofo fa marina ny teninareo ka tsy ho faty ianareo. Dia nanaiky izany izy,

²¹ nefa nifampiresaka hoe: -Tena meloka tokoa isika noho ny amin'ny rahalahintsika izay hitantsika ny fahoriam-panahiny tamin'ny fiangaviany antsika, nefa tsy mba nohenointsika; ary izao dia manody antsika izany.

²² Dia niteny i Reobena hoe: -Moa tsy efa nilaza taminareo ve aho hoe: Aza manao heloka bevava amin'i Josefa leiretsy, kanefa tsy nihaino ahy ianareo. Koa izao dia manody antsika ny rany.

²³ Tsy nampoizin'ireo hoe fantatr'i Josefa ny teniny, satria mpandika teny no niresahany taminy.

²⁴ Dia nihodina niala teo anatrehany aloha i Josefa mba hitomany. Ary niverina teo amin'ireto rahalahiny indray i Josefa ka nilaza taminy fa i Simehona no hotazoniny, sady nafatony teo imason'izy ireo.

²⁵ Avy eo dia nasainy nofenoina vary ny kitapon'izy ireo, ary naverina tao an-kitapony avy koa ny volan'ny isan-dahy sady nomena vatsy hoentiny eny an-dalana. Dia notanterahina izany.

²⁶ Ary nataingin'izy mirahalahy avy teo ambony borikiny ny kitapom-bary, dia lasa izy.

²⁷ Ary nony mby teo amin'ny toerana handriany hariva izy ireo, dia nosokafan'ny anankiray ny kitapony mba hanomezany sakafo ho an'ny borikiny, nefa indro ny volany hitany teo am-bavan'ny kitapo.

²⁸ Dia niteny tamin'ireo rahalahiny izy hoe: -Naverina ny volako, fa io anaty kitapoko io! Dia nivarahontsana izy ireo sady raiki-tahotra ka nifanontany hoe: Inona izao ataon'Andriamanitra amintsika izao?

²⁹ Nony tonga tany Kanahana teo amin'i Jakoba rainy izy ireo, dia nitantara taminy ny zava-niseho rehetra ka nanao hoe:

³⁰ -Ilay lehilahy tompon'ny tany dia nandrahona anay ka nilaza anay ho mpitsikilo.

³¹ Fa hoy izahay taminy: Olo-marina izahay fa tsy mpitsikilo.

³² Roa ambin'ny folo mirahalahy izahay no zanaky ny rainay, ka ny iray dia efa tsy ao intsony fa ny faralahy kosa dia nijanona any Kanahana miaraka amin'ny rainay.

³³ Saingy ilay lehilahy tompon'ny tany dia namaly anay fa te hahafantatra raha tena olo-marina tokoa izahay ka nanao hoe: Aoka ny iray aminareo hijanona eto amiko; fa ianareo sisa kosa mandehana, ento ny vary ho any amin'ny fianakavianareo mosarena.

³⁴ Dia ento aty amiko ny zandrinareo faralahy. Amin'izay dia ho fantatro fa tsy mpitsikilo ianareo fa olo-marina tokoa; dia haveriko aminareo i Simehona rahalahinareo, ary hahazo mivezivezy eto amin'ny tany ianareo.

³⁵ Ary nony nararak'izy ireo ny tao an-kitapony, dia indro samy am-ponosana tao an-kitapony avy ny volany. Ary rehefa nahita ireo vola voafono toy izany izy mbamin'ny rainy, dia samy raiki-tahotra.

³⁶ Ka hoy i Jakoba rainy taminy: -Tianareo tsy hanan-janaka ve aho? I Josefa efa tsy eo, i Simehona koa efa tsy eo, ary izao dia halainareo amiko indray i Benjamina! Izaho no ianjadian'izany rehetra izany.

³⁷ Fa hoy i Reobena tamin-drainy: -Vonoy ny zanako roa lahy raha tsy tongako eto aminao indray i Benjamina; fa atolory ahy izy, dia izaho no hamerina azy eto aminao!

³⁸ Hoy kosa i Jakoba hoe: -Tsia, tsy handeha hidina miaraka aminareo ny zanako. Efa maty ny rahalahiny, ary izy irery no sisa. Raha hisy fahavoazana manjo azy eny an-dalana, dia ianareo no hahatonga ity tenako efa antitra ity ho difotr'alahelo hankany amin'ny toeran'ny maty.