Genesỳ
Toko faha-32
1 Nifoha maraina koa i Labana ny ampitso, dia nanoroka ireo zanany vavy sy ireo zafikeliny, ka nanao veloma azy ary niverina nody.2 Nanohy ny diany i Jakoba, ary nisy anjelin'Andriamanitra nifanena taminy.
3 Rehefa nahita ireo i Jakoba, dia niteny hoe: -Tobin'Andriamanitra ity! Dia nantsoiny hoe Mahanaima izany toerana izany.
4 Ary i Jakoba nandefa iraka hialoha azy ho any amin'i Hesao rahalahiny, any ambanivohitr'i Edoma, any amin'ny tany Sehira.
5 Nanafatra an'ireo iraka izy hoe: -Izao no holazainareo amin'i Hesao: I Jakoba mpanomponao, tompokolahy, dia nanafatra anay hilaza hoe: Nivahiny tany amin'i Labana aho ary nijanona tany hatramin'izao.
6 Manana omby sy boriky sy ondry aman'osy aho ary koa mpanompo lahy sy vavy maro. Nandefa ireto irako ireto aho hampilaza aminao tompokolahy mba handraisanao ahy tsara.
7 Niverina tany amin'i Jakoba ireo iraka ka nilaza hoe: -Tonga tany amin'i Hesao rahalahinao izahay; ary ny tenany mihitsy no tamy hitsena anao miaraka amin'ny olona efajato lahy.
8 Dia raiki-tahotra mafy i Jakoba ka nangitakitaka; ary nozarainy ho antoko roa ny olona niaraka taminy sy ireo ondry aman'osy ary omby sy rameva,
9 fa hoy izy anakampony: Raha tonga hamely ny antoko iray i Hesao, dia afa-mandositra kosa ny antoko hafa.
10 Ary nivavaka i Jakoba nanao hoe: -Ry Andriamanitr'i Abrahama raibeko sy Andriamanitr'i Itsehaka raiko o, Ianao Ilay TOMPO efa nilaza tamiko hoe: Miverena any amin'ny taninao sy ny fianakavianao, dia hanisy soa anao Aho.
11 Tsy mendrika an'ireo mari-pitiavana sy zavatra azo antoka rehetra izay nataonao tamiko mpanomponao akory aho, satria tsy nanana afa-tsy tehina ny tenako raha niampita an'ity Jordana ity, ary ankehitriny kosa efa tonga antokony roa.
12 Mba afaho amin'ny tanan'i Hesao rahalahiko aho, satria matahotra azy, fandrao tonga izy ka hamono ahy sy ny zaza amam-behivavy ho faty.
13 Ianao manko efa nampanantena ahy hoe: Hanisy soa anao tokoa Aho, ka hahatonga ny taranakao ho marobe tsy hita isa tahaka ny fasika eny amoron-dranomasina.
14 Dia nandry teo i Jakoba tamin'iny alina iny. Ary naka avy tamin'izay teo an-tanany izy mba hatao fanomezana ho an'i Hesao rahalahiny,
15 dia osivavy roanjato sy osilahy roapolo, ondrivavy roanjato sy ondrilahy roapolo,
16 rameva telopolo ampianahany ombivavy efapolo sy ombilahy folo, borikivavy roapolo ary borikilahy folo.
17 Dia natolony hiandraiketan'ireo mpanompony ireny, ka nozarainy ho andiany vitsivitsy; dia hoy izy tamin'ireo mpanompony: Mandehana any alohako ka asio elanelany hatrany isaky ny andiany.
18 Nanome baiko ny mpanompo voalohany i Jakoba nanao hoe: -Rehefa mifanena aminao i Hesao rahalahiko, ka manontany anao hoe: An'iza moa ianao? Ho aiza ianao ary an'iza ireo biby fiompy mandeha eo alohanao?
19 dia hovalianao hoe: An'i Jakoba mpanomponao ireo, ary fanomezana izay nalefany ho anao, tompokolahy; fa izy kosa manaraka ao aorianay ao.
20 Nomeny baiko toy ny teo ihany koa ny faharoa sy ny fahatelo ary izay rehetra nanaraka ny andiam-biby hoe: -Izany teny izany no holazainareo amin'i Hesao, rehefa mifanena aminareo izy;
21 sady hampianareo hoe: Indro i Jakoba mpanomponao manaraka ao aorianay ao. I Jakoba manko dia niteny anakampo hoe: Hampitoneko amin'ireo fanomezana alefako mialoha ahy ireo izy, ka aorian'izay vao hiseho eo anatrehany aho; antenaiko fa ho tsara fandray ahy izy.
22 Dia nalefan'i Jakoba nialoha azy ny andiam-biby fa ny tenany kosa mbola nijanona tao an-toby tamin'iny alina iny.
23 Tamin'iny alina iny ihany no niainga i Jakoba, ka naka ny vadiny roa sy ny mpanompovaviny roa ary ny zanany iraika ambin'ny folo, dia lasa nita teo amin'ny fitana an'i Jaboka.
24 Nalainy ary nampitainy teo avokoa izay rehetra azy.
25 I Jakoba irery no sisa nijanona ary nisy lehilahy nifampitolona taminy mandra-pahazava ratsy ny andro.
26 Ary rehefa hitany fa tsy naharesy an'i Jakoba izy, dia nodoniny ny foto-pen'i Jakoba ka nipitsoka, raha izy mbola nifampitolona iny.
27 Dia hoy izy hoe: -Avelao aho handeha fa efa mazava ratsy ny andro. Hoy kosa i Jakoba taminy: -Tsy havelako ianao, raha tsy tsofinao rano aho.
28 Dia nanontany izy hoe: -Iza moa no anaranao? Ka hoy ny navaliny azy: -Jakoba.
29 Dia nanohy ny teniny izy hoe: -Tsy hantsoina hoe Jakoba intsony ianao fa hatao hoe Israely, satria efa nitolona tamin'Andriamanitra sy tamin'ny olona ianao ka nandresy.
30 Dia nanontany kosa i Jakoba hoe: -Mba lazao ahy, azafady, ny anaranao! Ary hoy izy hoe: -Ahoana no anontanianao ny anarako? Dia notsofiny rano teo i Jakoba.
31 Ka hoy i Jakoba hoe: -Efa nahita an'Andriamanitra nifanatri-tava tamiko aho, nefa tsy maty fo aman'aina. Izany no niantsoany io toerana io hoe Peniela, na hoe Tavan'Andriamanitra.
32 Efa niposaka ny masoandro raha niala teo Peniela i Jakoba, ary nandringa izy noho ny feny.
33 Izany no tsy ihinanan'ny Israelita ny hozatra eo amin'ny foto-pe mandraka androany, satria voadona teo amin'io hozatra io i Jakoba.