Ezekiela
Toko faha-44
1 Dia naverin-dralehilahy teo amin'ny vavahady ivelany tao atsinanan'ny Toeramasina aho; ary nihidy io vavahady io.2 Dia hoy ny TOMPO tamiko: "Hihidy io vavahady io ary tsy hovohana; tsy hisy olona handalo intsony eo satria Izaho TOMPO Andriamanitr'i Israely no efa niditra teo ka hihidy hatrany izy.
3 Nefa ny printsy filoha amin'ny maha-filoha azy dia mahazo mihinana ny sakafo masina eo anatrehako. Koa tsy maintsy hiditra sy hivoaka ity vavahady ity izy ary hamakivaky ny lalantsarany."
4 Avy eo dia nentin-dralehilahy niditra ny vavahady avaratra ho eo anoloan'ny tempoly aho. Hitako ny voninahitry ny TOMPO fa nameno ny trano; koa lavo nihohoka nitehi-tany aho.
5 Ary hoy ny TOMPO tamiko: "Ry ilay taranak'olombelona, mijere amin'ny masonao sy mihainoa amin'ny sofinao ary aoka ny fonao handinika izay rehetra lazaiko anao ny amin'ny lalana sy fitsipika rehetra momba ny tranoko. Diniho manokana ny fitsipika momba ny vavahady rehetra fidirana amin'ny tempoly sy fivoahana avy ao amin'ny Toeramasina.
6 "Ambarao amin'ireo Israelita maditra ireo fa izao no lazain'ny TOMPO ANDRIANANAHARY: Efa tofoka amin'ny zavatra maharikoriko nataonareo Israelita Aho.
7 Amin'ny fotoana izay nanoloranareo ny anjara sakafoko, izany hoe ny jabora sy ny ra avy tamin'ny soronareo, dia nampidiranareo vahiny tsy miraiki-po amiko sady tsy voafora tao amin'ny Toeramasina onenako. Nanimbazimba ny tempoliko ireo; ary nivadihanareo kosa ny fanekem-pihavanako tamin'ny zavatra maharikoriko nataonareo.
8 Tsy niraharaha ny fanompoana Ahy tao amin'ny Toeramasina onenako ianareo, fa nanendry ireo vahiny hanao azy hisolo anareo.
9 Koa izao no lazain'ny TOMPO ANDRIANANAHARY: Ny vahiny tsy miraiki-po amiko sady tsy voafora dia tsy misy hahazo miditra intsony ao amin'ny Toeramasina onenako, na dia mipetraka eo anivon'ny Israelita aza izy."""
10 "Ary ireo Levita izay nanalavitra Ahy, ka niaraka tamin'ny Israelita hafa nivily niala tamiko mba hanompo ireo sampiny, dia hizaka ny vokatry ny heloka vitany.
11 Hanao fanompoana ao amin'ny Toeramasina onenako izy ka hiambina ireo vavahadin'ny tempoly ary hanatanteraka asa tsotsotra isan-karazany ao an-tempoly. Hisolo ny olona izy hamono ireo biby hatao sorona dorana manontolo sy sorona hafa ka hijoro eo anoloan'ny vahoaka mba hanompo azy.
12 Kanefa noho ireo nanelanelana ny vahoaka tamin'ny sampy sady nitarika ny Israelita hanota mihitsy aza, dia Izaho Tompo ANDRIANANAHARY no manao fianianana sy teny hentitra fa hamely azy. Eny, hizaka ny vokatry ny heloka vitany izy,
13 ka tsy hahazo manatona Ahy hanao ny asan'ny mpisorona intsony ary tsy hahazo manakaiky ireo fanaka rehetra voatokana ho Ahy na manakaiky ny Toeramasina Indrindra. Hizaka ny vokatry ny asa mahamenatra sy maharikoriko nataony izy.
14 Ny hany hampisahaniko azy dia ny anjara raharahany ao an-tempoly momba ireo fanompoana rehetra sy fanao rehetra ao."
15 "Ireo Levita mpisorona, taranak'i Tsadoka , dia nitandrina kosa ny anjara raharahany momba ny Toeramasina onenako, na dia nivily niala tamiko aza ny Israelita. Noho izany, dia ireo ihany no hahazo manatona hanompo Ahy TOMPO sy hanolotra amiko ny sabora sy ny ran'ny sorona; teny hentitra avy amiko TOMPO ANDRIANANAHARY izany.
16 Ireo ihany no hiditra ao amin'ny Toerako masina sy hanatona ny latabatra natokana hanompoana Ahy. Hotandremany izay nasaiko hotandremana momba izany.
17 Ary raha miditra ny vavahadin'ny kianja anatiny ny mpisorona, dia hitondra ny akanjo fanamiana fotsy. Tsy hitondra akanjo volonondry eny aminy izy mandritra ny anatanterahany ny asany ao an-kianja anatiny sy ao an-tempoly.
18 Satroka rongony fotsy no ho eo an-dohany ary pataloha rongony fotsy no hanaovany. Tsy hitondra zavatra mamehifehy mahatsemboka azy izy.
19 Ary rehefa hivoaka hankany amin'ny kianja ivelany izay misy ny sarambabem-bahoaka izy, dia hoesoriny ireo fanamiana nanaovany teo am-panatanterahana ny asany ka hapetrany ao amin'ny efitrano voatokana, ary hiakanjo fitafiana hafa izy; izany no tsy hampahitany loza ny vahoaka amin'ireny fanamiany ireny.
20 Tsy hanaratra ny lohany tanteraka ny mpisorona, nefa tsy hanao lava volo fa hanety azy tsara."
21 Tsy hisotro toaka izy alohan'ny hidirany ao amin'ny kianja anatiny.
22 Ny mpisorona dia tsy hanambady vehivavy maty vady na nisara-bady, fa zatovovavy israelita ihany no halainy ho vady na koa vehivavy mpitondratena navelan'ny mpisorona.
23 "Ny mpisorona no hampianatra ny vahoakako hanavaka ny masina sy ny tsy masina ary ny madio sy ny maloto.
24 Izy no ho mpitsara amin'ny fifanolanana ary hamoaka didim-pitsarana araka ny lalanako. Hankalaza ny fetim-pivavahana araka ny fitsipika sy ny fepetra nataoko izy sady hanokana ny andro sabata ho Ahy.
25 Ny mpisorona dia tsy tokony handoto tena amin'ny fanatonana ny fatin'olona, afa-tsy raha fatin'ny rainy na reniny na zanany na rahalahiny na koa anabaviny tsy mbola nanambady."
26 Ary amin'ny toy izany dia hiandry fito andro aorian'ny fidiovany tena izy vao hahazo hiditra amin'ny raharahany.
27 Amin'ny andro izay hiverenany ao an-kianja anatiny amin'ny Toeramasina, dia hanolotra sorona fanalana ny ota izy; teny hentitra avy amiko TOMPO ANDRIANANAHARY izany.
28 Hisy fananana ho an'ny mpisorona, dia Izaho izany; koa tsy homenareo zaratany amin'i Israely izy, fa Izaho no anjarany.
29 Ny fanatitra vokatry ny tany sy ny biby natolotra ho sorona fanalana ny ota na ho sorom-panonerana no hohaniny. Ny zavatra rehetra natokana ho Ahy amin'i Israely, dia ho an'ny mpisorona.
30 Horaisin'ny mpisorona ny santatry ny voaloham-bokatra ary izay rehetra navahana ho Ahy tamin'ny harenan'ny Israelita. Homen'ny olona azy koa ny koba lafarinina tsara indrindra mba hitahiako ny ao an-tranony.
31 Ny mpisorona anefa dia tsy mahazo mihinana ny vorona sy ny biby maty ho azy na noviravirain'ny bibidia."