Estera Grika

Toko faha-9

¹ Ny andro faha-13 tamin'ny volana faha-12 na hoe volana Adara manko dia nihatra ny taratasy nosoratan'ny amperôra. ² Androtr'io no nandringanana ny fahavalon'ny Jiosy. Tsy nisy olon-kafa nahatohitra azy fa natahotra azy avokoa. ³ Ny governoram-paritany sy ny mpiasam-panjakana ary ny mpitantsora-panjakana dia nikarakara tsara ny Jiosy, satria nanindry azy ny fahatahorana an'i Môrdôkay, ⁴ fa nampiely laza an'i Môrdôkay eran'ny fanjakana manontolo ny didin'ny amperôra.

⁶ Tao an-tanànan'i Soza dia dimanjato lahy no maty naringan'i Jiosy. ^7-10 Novonoiny ho faty koa izy folo lahy zanak'i Hamàna, ilay atao hoe Bogeo sady zanakalahin'i Hamadatà no fahavalon'ny Jiosy: dia ry i Farsanestahîna sy i Delfôna ary i Fasgà, i Fardatà sy i Bareà ary i Sarbaka, i Marmasimo sy i Arofeo ary i Arseo sy i Zaboteo. Avy eo dia norobain'ny Jiosy ny fananany. ¹¹ Androtr'izay ihany dia natolotra ny amperôra ny isan'ny voavono tao Soza. ¹² Ary hoy ny amperôra tamin'i Estera:
–Teto Soza ihany dia dimanjato lahy no maty naringan'ny Jiosy. Araka ny hevitrao, fomba ahoana no nataony tany amin'ny faritra manodidina? ...Raha mbola misy zavatra angatahinao, dia ho azonao koa izany. ¹³ Ka hoy i Estera tamin'ny amperôra:
–Aoka ny Jiosy mbola homen-dalana hanao toy ny nataony androany koa rahampitso, ary aoka hahantona amin'ny hazo ireo fatin'izy folo lahy zanak'i Hamàna!

¹⁴ Dia navelan'ny amperôra hatao izany; ary namoaka didy izy ho an'ny Jiosy tao an-tanànan'i Soza mba hanantonany ny fatin'ireo zanakalahin'i Hamàna. ¹⁵ Koa nivory indray ny Jiosy tao Soza ny andro faha- ¹⁴ tamin'ny volana Adara, ka namono nahafaty telonjato lahy; saingy ny fananany tsy mba norobainy tsy akory.

¹⁶ Ny Jiosy hafa rehetra eran'ny fanjakana koa dia nivory mba hifanampy. Ny andro faha- ¹³ tamin'ny volana Adara no afaka tamin'ny mpamely azy izy ka olona 15000 no matiny; saingy ny fananany tsy mba norobainy tsy akory. ¹⁷ Ary nitsahatra izy nony andro faha-14 tamin'io volana io ka nandany izany androm-pitsaharana izany tamin-kafaliana sy firavoana. ¹⁸ Ny Jiosy tao Soza kosa, izay nivory hifanampy indray tamin'ny andro faha-14 fa tsy mbola nitsahatra, dia nandany ny andro faha-15 tamin-kafaliana sy firavoana. ¹⁹ Noho izany, ny Jiosy izay niely tany amin'ny faritany isan-tokony lavitra any, dia mankalaza an-karavoana ny andro faha-14 amin'ny volana Adara ho toy ny andro fety hifanateran-panomezana. Ireo mponin'ny tanàn-dehibe kosa dia mankalaza ny andro faha-15 amin'ny volana Adara ho toy ny andro fety firavoana ka hifanateram-panomezana.

²⁰ Ny tantaran'izany zava-nitranga izany dia nosoratan'i Môrdôkay ho boky, izay nalefany tany amin'ny Jiosy rehetra tao anatin'ny fanjakàn'i Artakserksesa, na ny akaiky na ny lavitra. ²¹ Niangavian'i Môrdôkay ry zareo mba hankalaza ho andro fety ny andro faha-14 sy faha-15 amin'ny volana Adara. ²² Ireo manko no nahafahan'ny Jiosy tamin'ny fahavalony. Tokony hotsarovan'ny Jiosy ny fanafahana azy koa ny volana Adara, satria io volana io no nampodiana ny alahelony ho fifaliana sy ny fahoriany ho andro fety: io volana io dia hankalazaina manontolo ho vaninandro fety hanaovana fanasana sy firavoravoana ka hifanateram-panomezana sy hahafoizan-javatra ho an'ny mahantra.

²³ Nankatoavin'ny Jiosy izany, araka izay voasoratr'i Môrdôkay taminy, ²⁴ dia ny fomba nataon'i Hamàna, ilay Masedônianina zanakalahin'i Hamadatà, mba hamelezana azy. Fa nanomana didy handringanana ny Jiosy i Hamàna sy nanao antsapaka handraiketana ny fotoanandro ²⁵ ary efa nankany amin'ny amperôra mba hangataka aminy ny hanantonana an'i Môrdôkay. Saingy ny loza rehetra notetehiny hafitsoka amin'ny Jiosy dia nihatra taminy; ka ny tenany sy ny zanany lahy no nahantona tamin'ny hazo.

²⁶ Izany no iantsoana ireo andro ireo hoe «Porîma», noho ny amin'ny antsapaka, satria amin'ny fitenin'ny Jiosy ny hoe antsapaka dia midika hoe «Porîma». Ireo andro ireo, amin'ny alalan'ny tantara raketin'ny hafatra an-tsoratr'i Môrdôkay, no ahatsiarovana ny fijaliana rehetra niaretan'ny Jiosy ary koa ny zavatra rehetra nihatra taminy. ²⁷ I Môrdôkay no nanorina ireo andro fety ireo ary nankatoavin'ny Jiosy izany ho an'ny tenany sy ny taranany ary koa izay rehetra miray fivavahana aminy; tsy hivaona mihitsy izy amin'ny fomba fankalazana izany. Ireo andro fety ireo dia ho fahatsiarovana tontosaina amin'ny taranaka mifandimby rehetra isam-pianakaviana sy isan-tanàna ary isam-paritany. ²⁸ Ny andro Porîma dia hankalazaina hatrany hatrany. Aoka tsy ho voakosoka eo amin'ny taranaka ho avy ny fahatsiarovana izany!

²⁹ I Estera mpanjakavavy sady zanakavavin'i Haminadaba, ary koa ilay Jiosy Môrdôkay dia nanoratra ny tantaran'ny zava-bitany, ho fanamafisana ny taratasy momba ny Porîma. ³¹ I Estera sy i Môrdôkay dia nanorina izany fety izany koa ho an'ny tenany avy; ary niasa ho fanasoavana azy mianaka ny fanapaha-keviny. ³² Ny baikon'i Estera no nahatonga io fety io ho zavatra raikitra; ary dia natao an-tsoratra izany mba ho voatadidy.