Estera Grika
Toko faha-5
7[3] Ary hoy ny amperôra taminy:-Inona no irinao, ry Estera? Inona no tadiavinao? Fa na dia hatramin'ny antsasaky ny fanjakako aza, dia ho azonao izany.
18[4]
Fa novalian'i Estera hoe:
-Andro lehibe ho ahy ity andro anio ity. Raha sitrakao, ry andriamanjaka, dia aoka ianao miaraka amin'i Hamàna anio ho tonga amin'ny fanasana izay efa nomaniko!
19[5]
Koa nampanantsoin'i amperôra faingana i Hamàna mba hanaiky ny fiangavian'i Estera. Dia nankao amin'ny fanasana izay efa niangavian'i Estera azy ny amperôra mbamin'i Hamàna.
20[6]
Teo am-pamaranana ny sakafo, dia hoy ny amperôra tamin'i Estera:
-Fa maninona ianao, ry Estera mpanjakavavy? Izay rehetra hangatahinao dia ho azonao.
21[7]
Dia novaliany hoe:
–Ny angatahiko sy tadiaviko ve?
22[8]
Izao no izy, ry andriamanjaka: raha nahazo sitraka taminao aho, dia aoka ianao miaraka amin'i Hamàna mbola ho tonga ihany rahampitso amin'ny fanasana izay homaniko ho anareo ary hokarakaraiko toy ilay natao androany.
23[9]
Tena sambatra sy falifaly tokoa i Hamàna no nivoaka ny tranon'ny amperôra. Saingy, teo an-kianjan'ny lapa, dia nahita an'i Môrdôkay i Hamàna, ka feno fahatezerana fatratra.
24[10]
Lasa nody tany an-tranony izy, dia naniraka olona haka ireo sakaizany sy i Zôsarà vadiny.
25[11]
Nasehon'i Hamàna tamin'ireo ny hareny ary koa ny voninahitra izay nototofan'ny amperôra azy, dia ny nanaovany azy ho Praiministra sy ny nanankinany azy ny fitondràm-panjakana.
26[12]
Dia hoy koa i Hamàna hoe:
–I Estera mpanjakavavy aza dia tsy niantso olona afa-tsy izaho ihany hiaraka amin'ny amperôra tamin'ny fanasana. Ary mbola antsoiny koa aho rahampitso.
27[13]
Kanefa tsy sitrako izany, raha mbola hitako ao an-kianjan'ny lapa ilay Jiosy Môrdôkay.
28[14]
Dia hoy i Zôsarà vadin'i Hamàna sy ireo sakaizany taminy:
–Aoka ianao hampanapaka hazo fanantonana ka ho 25 metatra ny haavony; ary raha maraina, dia angataho amin'ny mpanjaka mba hahantona eo i Môrdôkay. Avy eo dia mandehana amin-kafaliana ianao miaraka amin'ny amperôra ho any amin'ny fanasana.
Ary sitrak'i Hamàna izany hevitra izany ka dia nampanamboariny tokoa ilay hazo.