Apôkalipsỳ

Toko faha-18

¹ Taorian'izany, dia hitako nisy anjely anankiray hafa koa nidina avy tany an-danitra; nanana fahefana lehibe io anjely io ary nanazava ny tany tontolo ny famirapiratany.

² Dia niantso tamin'ny feo mahery izy nanao hoe: Rava, rava i Babilona lehibe, ka tonga fonenan'ny demony, sy fieren'ny fanahy maloto rehetra, ary fieren'ny vorona amam-biby maloto rehetra halan'ny olona!

³ Fa ilay divain'ny fijangajangany mihoa-pampana no nisotroan'ny firenena rehetra; ka ny mpanjakan'ny tany dia nijangajanga taminy, ary ny mpandranto manerana ny tany efa tonga mpanankarena satria tia filibana loatra io tanana io.

⁴ Dia reko nisy feo iray hafa koa avy tany an-danitra nanao hoe: Miala amin'io tanana io ianareo, ry vahoakako, mba tsy hiombom-pahotana aminy ary mba tsy hiharan'ny loza hanjo azy;

⁵ satria efa niavosa nitehika tamin'ny lanitra ny fahotany ary tsy hadinon'Andriamanitra ny hanasazy ny ratsy nataony.

⁶ Mamalia azy araka izay nafitsony taminareo, ka ataovy avo sasaka noho izay vitany; ny tsatokaty, izay nasiany zava-pisotro mifangaro ho anareo, dia asio zava-pisotro mifangaro indroa heny ho azy;

⁷ toraka izay nitiavany voninahitra sy filibana no anomezo azy fanaintainana sy fisaonana. Fa izao no lazain'io tanana io anakampony: 'Mipetraka toy ny mpanjakavavy aho fa tsy mpitondratena, ka lavitra ahy raha izay fisaonana!'

⁸ Noho izany, anatin'ny indray andro monja no hiantontan'ny loza hanjo azy, dia fahafatesana sy fisaonana ary mosary, sady handevonan'ny afo azy; satria mahery ny Tompo Andriamanitra, Izay nitsara azy.

⁹ Ny mpanjakan'ny tany, izay nijangajanga tamin'i Babilona sy niara-niliba taminy dia hitomany azy sy handondon-tratra hisaona azy, rehefa hahita ny setroka vokatry ny fandoroana azy.

¹⁰ Hijanona eny lavitra eny izy ireo, satria raiki-tahotra noho ny fanaintainana mianjady amin'i Babilona, ka hanao hoe: Indrisy! Indrisy! Ry Babilona, tanana lehibe, tanana matanjaka! Satria tanaty adiny iray monja dia niharan'ny sazy ianao!

¹¹ Ny mpandranto manerana ny tany koa dia mitomany sy misaona azy, satria tsy misy mpividy intsony ny entany:

¹² dia volamena sy volafotsy; vatosoa sy perla; lamba rongony madinika sy lamba volomparasy; lamba landy sy lamba jaky; hazo mani-pofona isan-karazany; fanaka isan-karazany vita amin'ny ivoary sy hazo sarobidy mbamy halimo sy vy ary vatokaranana;

¹³ havozomamy sy hodi-kazo manitra; ilomanitra sy miora ary vovo-javamanitra; divay sy diloilo; lafarinina tsara toto sy varimbazaha; omby sy ondry; soavaly sy kalesy; ary mpanompo sy babo.

¹⁴ Hoy ireo mpandranto ireo amin'i Babilona: Ny vokatra soa nirin'ny fonao dia efa niala taminao; ary ny zava-tsarobidy sy marevaka rehetra dia efa levona lavitra anao, ka tsy ho hitanao intsony!

¹⁵ Ny mpandranto, izay nahazo harena tamin'i Babilona noho ireny entana ireny, dia hijanona eny lavitra eny, satria raiki-tahotra noho ny fanaintainana mianjady amin'i Babilona ka hitomany sy hisaona

¹⁶ sady hanao hoe: Indrisy! Indrisy! Ry tanana lehibe, izay nitafy lamba rongony madinika sy lamba volomparasy ary lamba jaky, sady niravaka volamena sy vatosoa ary perla!

¹⁷ Satria tanaty adiny iray monja dia foana izany harem-be izany! Ny mpitondra sambo rehetra sy ny mpandeha sambo rehetra amin'iny faritra iny ary ny matilo mbamy izay rehetra manao raharaha eny an-dranomasina, dia nijanona teny lavitra teny koa;

¹⁸ ary niantsoantso izy rehetra, raha nahita ny setroka vokatry ny fandoroana an'i Babilona, ka nanao hoe: Aiza intsony re no misy tahaka izany tanana lehibe izany?

¹⁹ Dia nanipy vovoka hiraraka tamin'ny lohany izy ireo sady nitomany sy nisaona ka niantsoantso hoe: Indrisy! Indrisy! Ry tanana lehibe, izay rakotra zava-tsarobidy ka nampahazo harena ny olona rehetra manana sambo eny an-dranomasina! Satria tanaty adiny iray monja dia foana ianao!

²⁰ Mifalia amin'ny manjo an'i Babilona ianao, ry lanitra, sy ianareo vahoakan'Andriamanitra mbamy ianareo apostoly sy mpaminany, satria efa nitsara azy Andriamanitra ka nanome rariny anareo!

²¹ Ary nisy anjely anankiray manan-kery, naka vato tahaka ny vato lehibe fikoseham-bary, dia nanipy azy tany an-dranomasina ka nanao hoe: Hatsipy mafy toy izay i Babilona, ilay tanana lehibe, ka tsy ho hita intsony!

²² Dia tsy ho re ao aminao intsony ny mozika fanaon'ny mpitendry lokanga sy ny mpihira ary ny mpitsoka sodina sy ny mpitsoka trompetra; tsy ho hita ao aminao intsony ny mpiasa rehetra amin'ny taozavatra isan-karazany; tsy ho re ao aminao intsony ny feon'ny vato fikoseham-bary.

²³ Tsy hamiratra ao aminao intsony ny fahazavan'ny jiro; tsy ho re ao aminao intsony ny feon'ny mpivady vao. Satria ny mpandrantonao no efa mpifehy ny tany, sady ny ody ratsinao no nentinao namitaka ny firenena rehetra.

²⁴ Hatsipy mafy toy izany i Babilona, satria tao aminy no nahitana ny ran'ireo mpaminany sy ny ran'ireo vahoakan'Andriamanitra ary ny ran'izay rehetra novonoina tety ambonin'ny tany!