2 Tantara

Toko faha-32

¹ Taorian'izany zava-nitranga sy fanehoam-piraiketam-po tamin'Andriamanitra izany, dia tonga tao Joda i Saneheriba mpanjakan'i Asiria ary nanao fahiranony tanana mimanda ka nikendry haka azy.

² Rehefa hitan'i Hezekia fa tonga i Saneheribaka nikasa hamely an'i Jerosalema,

³ dia niara-nidinika tamin'ny manampahefana sy ny mpitari-tafika izy ny amin'ny tokony hanampenana ny loharano rehetra any ivelan'ny tanana; ka niandanian'ireo ny mpanjaka.

⁴ Dia vory maro ny olona ka nanampinany loharano rehetra sy ilay renirano mikoriana anaty lakan-drano ambanin'ny tany. Hoy manko ireo anakampony hoe: "Tsy tokony hahita izao ranobe izao ny mpanjakan'i Asiria, rehefa tonga eto!"

⁵ Nentanin-kerimpo hatrany i Hezekia ka nampanamboatra izay rehetra rava tamin'ny manda sady nampanisy tilikambo teny amboniny sy manda hafa koa teo ivelany; nampanamafisiny ny toerana Milao tao an-Tananan'i Davida ary lefona aman'ampinga betsaka no nampanefeny.

⁶ Dia nanendry mpitondra miaramila izy mba hifehy ny mponina tao an-drenivohitra. Ary nasain'i Hezekia ny besinimaro hivory teo amin'ny toera-malalaka akaikin'ny vavahadin'ny tanana ka nanaovany teny fampirisihana hoe:

⁷ "Mahereza ka matanjaha. Aza matahotra na mivadi-po eo anoloan'ny mpanjakan'i Asiria sy ny hamaroan'ny miaramila rehetra izay entiny; fa misy hery lehibe kokoa miaraka amintsika noho ny miaraka aminy.

⁸ Herin'olombelona no miaraka aminy, fa ny TOMPO Andriamanitsika kosa no miaraka amintsika; Izy no hanampy antsika sy hisahana ny adintsika.Dia izany tenin'i Hezekia mpanjakan'i Joda izany no nianteheran'ny mponina teo an-drenivohitra."

⁹ Taorian'izay dia nanao fahirano an'i Lakisy i Saneheriba mpanjakan'i Asiria ary koa ny tafiny manontolo. Avy ao i Saneheriba no naniraka manamboninahitra hankany Jerosalema ho any amin'i Hezekia mpanjakan'i Joda sy ho any amin'ny Jodeanina rehetra nonina tao an-drenivohitra. Ka hoy ny hafatra nampitain'ireto iraka hoe:

¹⁰ -Izao no lazain'i Saneheriba mpanjakan'i Asiria: "Mba inona izao itokianareo izao no dia miaritra fahoriana ato Jerosalema ianareo?

¹¹ Tsy i Hezekia ihany va no manambosy anareo hanolo-tena ho faty mosary sy hetaheta ka milaza fa ny TOMPO Andriamanitrareo no hamonjy anareo tsy hiharan'ny fahefako?

¹² Kanefa io Hezekia io koa no nandrava ireo toeram-pisoronana aman' alitarany, ka nandidy ny mponin'i Joda sy i Jerosalema mba tsy hanao fanompoam-pivavahana afa-tsy eo anoloan'ny alitara tokana ary tsy handoro sorona hanetona afa-tsy eo ihany?

¹³ Tsy fantatrareo va izay nataon'ireo razako sy ny tenako tamin'ny firenena hafa rehetra eto an-tany?Moa nisy nahavonjy ny taniny tsy hiharan'ny fahefako ve ireo andriamanitry ny firenen-kafa?

¹⁴ Ny andriamanitr'ireo firenena efa naringan'ny razako ireo dia tsy nisy nahavonjy ny olony tsy hiharan'ny fahefako, ka dia hahavonjy anareo tsy hiharan'ny fahefako va ny Andriamanitrareo?

¹⁵ Ankehitriny ary, aza mety ho fitahin'i Hezekia na ho voasodokany tahaka izao ianareo;aza matoky azy ianareo. Tsy nisy manko andriamanitra, tany amin'ny firenena amam-panjakana isan-tokony, izay nahavonjy ny olony tsy hiharan'ny fahefan'ireo razako na ny fahefako; noho izany, ireo andriamanitrareo koa tsy hahavonjy anareo tsy hiharan'ny fahefako."

¹⁶ Ary ny manamboninahitra nirahin'i Saneheriba dia nanohy niteny ratsy nanohitra ny TOMPO Andriamanitra sy nanohitra an'i Hezekia mpanompony.

¹⁷ Dia nanoratra taratasy koa ity mpanjakan'i Asiria mba hihantsiana ny TOMPO Andriamanitr'i Israely sy hanarabiana Azy. Ka hoy izy hoe: "Tsy nahavonjy ny olony tsy hiharan'ny fahefako ny andriamanitr'ireo firenena hafa teto an-tany; noho izany, ny Andriamanitr'i Hezekia dia tsy hahavonjy koa ny olony tsy hiharan'ny fahefako."

¹⁸ Ankoatra izany, ireto irak'i Saneheriba ireto dia niantso tamin'ny feo mahery sady araka ny fiteny jodeanina teo anatrehan'ny mponin'i Jerosalema izay teny ambonin'ny manda; ny hampitahorany sy hampangorohoroany azy mba hahazoany ny tanana no anton'izany.

¹⁹ Ary ny fitenenany an'ilay Andriamanitr'i Jerosalema koa dia toy ny fitenenany an'ireny andriamanitry ny firenena any an-tany hafa ireny, izay sarivongana asan-tanan'olona ihany.

²⁰ Noho izany toe-javatra izany dia nivavaka i Hezekia mpanjaka sy i Isaia mpaminany zanakalahin'i Amotsa, ka niantso vonjy tamin'Andriamanitra.

²¹ Ny Tompo kosa naniraka anjely, izay nandringanany miaramila maherifo rehetra sy ny manamboninahitra ary ny komandy teo an-tobin'ny mpanjakan'i Asiria. Ka dia lasa nody tamin-kenatra i Saneheriba; ary nony niditra tao an-tranon'ny andriamaniny izy, dia ireo zanany naterany ihany no namono nahafaty azy tao tamin'ny sabatra.

²² Toy izany no namonjen'ny TOMPO an'i Hezekia sy ny mponin'i Jerosalema tsy ho azon'i Saneheriba mpanjakan'i Asiriana ho azon'ny fahavalo hafa rehetra; ary nanomezany azy fiadanana tamin'ny sisin-tany manodidina.

²³ Olona maro no nitondra fanatitra ho an'ny TOMPO tao Jerosalema ary koa fanomezana ho an'i Hezekia mpanjakan'i J oda ; ka nanomboka tamin'izay i Hezekia no nalaza teo imason'ny firenen-drehetra manodidina.

²⁴ Tamin'izany andro izany dia narary efa saiky maty i Hezekia; koa dia nivavaka tamin'ny TOMPO izy, ary novaliany sady nanaovany zava-mahagaga.

²⁵ I Hezekia kosa tsy mba namaly araka izay soa efa natao taminy; fa niavonavona am-po izy ka niharan'ny fahatezeran'Andriamanitra ny tenany mbamin'i Joda sy i Jerosalema.

²⁶ Kanefa, na dia efa niavonavona am-po aza ity mpanjaka, dia niaiky heloka izy mbamin'ny mponin'i Jerosalema; ka tsy niharan'ny fahatezeran'ny TOMPO ireo, fony fahavelon'i Hezekia.

²⁷ Harena amam-boninahitra be dia be tokoa no nananan'i Hezekia. Ka nanao trano firaketana izy hametrahany ny volafotsy sy ny volamena, ny vato soa sy ny zava-manitra ary ny ampinga mbamin'ny fanaka sarobidy isan-karazany;

²⁸ nanao trano fitahirizam-bokatra izy, dia vokatra toy ny vary sy ny divay ary ny menaka; ary nanao trano fisoko izy ho an'ny biby fiompy samy hafa sy nanao trano ho an'ny ondry aman'osy.

²⁹ Nanao tanana maro ho an'ny tenany koa i Hezekia sady nanana ondry aman'osy ary omby betsaka, satria nomen'Andriamanitra fananana be dia be izy.

³⁰ I Hezekia ihany koa no nanampina ny lakan-drano ambony ao amin'ny loharanon'i Gihona ka nampandeha azy ambanin'ny tany mba hidina mahitsy ho any andrefan'ny Tananan'i Davida.Nambinina tamin'ny asany rehetra i Hezekia.

³¹ Noho izany, rehefa nandefasan'ny manampahefana babilonianina iraka izy mba hanontany momba ny zava-mahagaga nitranga teo amin'ny taniny , dia navelan'Andriamanitra hanao saim-pantatra izy mba hisedrany azy ka hahalalany izay toetrany rehetra.

³² Ny sisa amin'ny tantaran'i Hezekia sy ireo soa nataony dia voasoratra ao amin'ny boky miloha teny hoe Fahitan'i Isaia mpaminany zanakalahin'i Amotsa ary ao amin'ny Bokin'ireo mpanjakan'i Joda sy i Israely.

³³ Rehefa lasa nodimandry any amin'ny razany kosa i Hezekia, dia nalevina tao amin'ny faritra ambony eo amin'ny fasan'ireo taranak'i Davida; tamin'izay ny mponin'i Jerosalema sy ny Jodeanina hafa rehetra dia samy nanome voninahitra azy. Ary i Manase zanakalahin'i Hezekia no nanjaka nandimby azy.