2 Samoela

Toko faha-21

¹ Nisy mosary naharitra telo taona misesy tamin'ny andron'i Davida. Nanontany ny TOMPO momba izany i Davida ka novaliany hoe: Avy amin'i Saoly sy ny fianakaviany lian-dra izao, satria i Saoly no namono nahafaty ny Gibehonita.

² Nampiantso ny Gibehonita ny mpanjaka mba hiresahany. Ny Gibehonita moa tsy mba isan'ny Israelita, fa sisa tsy maty tamin'ny Amorita. Efa nianiana taminy manko ny Israelita fa tsy haninona azy; nefa i Saoly, noho ny fitiavany an'i Israely sy i Joda, dia nitady hamongotra azy.

³ Ka hoy i Davida tamin'ny Gibehonita: Inona no hataoko ho anareo! Ahoana no hanonerako ny ratsy izay nihatra taminareo, mba hitsofanareo rano ny vahoakan'ny TOMPO?

⁴ Dia hoy ny Gibehonita taminy: Tsy vitana volafotsy na volamena, na koa fahafatesan'ny Israelita iray ny adinay amin'i Saoly sy ny fianakaviany. Ka hoy i Davida: Koa lazao ary izay tianareo hataoko, fa hotanterahiko.

⁵ Dia hoy ireo tamin'ny mpanjaka: I Saoly no nikasa handripaka anay sy hamongotra anay tsy hisy tavela eo amin'ny tanin'i Israely manontolo;

⁶ ka avelao hisy fito lahy amin'ny taranany hatolotra anay mba hahantonay eo anatrehan'ny TOMPO ao Gibeha tananan'i Saoly ilay mpanjaka voafidin'ny TOMPO. Ka hoy ny mpanjaka: Hatolotro ireo.

⁷ Notsimbinin'ny mpanjaka manokana i Mefiboseta, zanakalahin'i Jonatana sady zafikelin'i Saoly, noho ny fianianana nataon'i Davida sy i Jonatana tamin'ny anaran'ny TOMPO.

⁸ Fa nalain'ny mpanjaka i Armony sy i Mefiboseta zanakalahin'i Ritsepa izay zanakavavin'i Aia, ka izy roa lahy ireo dia naterany tamin'i Saoly; ary nalainy koa izy dimy lahy zanak'i Mikala izay zanakavavin'i Saoly, ka ireo dia naterany tamin'i Adriela zanakalahin'i Barzilay avy any Mehola.

⁹ Natolotr'i Davida teo an-tanan'ny Gibehonita izy fito lahy ka nahanton'ireo teo an-kavoana iray teo anatrehan'ny TOMPO. Niara-maty avokoa izy fito lahy, satria samy novonoina ho faty tamin'ny fiandohan'ny vaninandro fijinjana orza.

¹⁰ Naka ny lamba gony fisaonana i Ritsepa zanakavavin'i Aia, ka novelariny teo ambony vatolampy; dia nitoetra teo izy nanomboka tamin'ny fiandoham-pijinjana ka mandra-pilatsaky ny orana avy any an-danitra tamin'ireo faty ireo. Tsy navelany hipetrahan'ny voromanidina teo aminy tamin'ny antoandro; ny bibidia kosa no tsy navelany hankeo tamin'ny alina.

¹¹ Nisy nanambara tamin'i Davida izay nataon'i Ritsepa zanakavavin'i Aia sady vaditsindranon'i Saoly.

¹² Koa dia nalain'i Davida ny taolambalon'i Saoly sy i Jonatana zanany tamin'ny mponin'i Jabesa any Gilehada; ireo manko no nangalatra azy tao an-kianjan'i Bety-Seana, toerana nanantonan'ny Filistinina azy tamin'ny andro namonoan'ny Filistinina an'i Saoly tao Gilboa.

¹³ Dia nentin'i Davida avy tany ny taolambalon'i Saoly sy i Jonatana zanany, ary nangoniny koa ny taolan'ireto fito lahy voahantona.

¹⁴ Nalevin'ny olona tany amin'ny tanin'i Benjamina, tao Tsela, tao amin'ny fasan'i Kisy rain'i Saoly ireo taolambalo rehetra ireo; ary vitany avokoa izay nandidian'ny mpanjaka. Rehefa izany, vao nanambina ny tany Andriamanitra.

¹⁵ Nipoaka indray ny ady teo amin'ny Filistinina sy ny Israelita. Dia nidina nanafika ny Filistinina i Davida sy ireo miaramila niaraka taminy; ary nahatsiaro reraka i Davida.

¹⁶ Koa nihevitra ny hahafaty an'i Davida i Jisby-Benoba isan'ny taranak'i Harafa, izay nanana lohan-defona halimo milanja telo kilao mahery sy fiadiana vaovao.

¹⁷ Fa tonga nanampy azy i Abisay zanakalahin'i Tseroia ka namely ary nahafaty an'ilay Filistinina. Tamin'izay ireo olon'i Davida dia nianiana taminy hoe: Tsy hiara-miainga aminay intsony ianao ho amin'ny ady, mba tsy hamono anao ho faty ny fahazavan'i Israely.

¹⁸ Rehefa izany dia mbola nisy ady indray tamin'ny Filistinina tao Goba; tamin'izay i Sibekay avy any Hosa no namono ho faty an'i Safa isan'ny taranak'i Harafa.

¹⁹ Mbola nisy ady hafa tao Goba, ary tamin'izay i Elehanana zanakalahin'i Jahiry-Oregima sady avy any Betlehema, no namono ho faty an'i Goliata avy any Gata, izay nanana zaran-defona vaventy tahaka ny voditenon'ny mpanenona.

²⁰ Dia mbola nisy ady koa tany Gata; ary tao dia nisy olona raindahiny nanana rantsan-tanana enina sy rantsan-tongotra enina, izany hoe efatra amby roapolo no fitambarany. Ilehio koa dia taranak'i Harafa.

²¹ Nihaika ny Israelita izy ka matin'i Jonatana zanakalahin'i Simeha izay rahalahin'i Davida.

²² Ireo miaramila filistinina efa-dahy ireo, izay samy taranak'i Harafa sady tao Gata, dia lavo noho ny famelezan'i Davida sy ny miaramilany azy.