2 Mpanjaka

Toko faha-8

¹ Indray andro dia niteny tamin'ilay vehivavy nanan-janakalahy maty nefa novelominy indray i Elisa, ka nanao hoe: Miala eto ianao sy ny fianakavianao ka mifindra monina any amin'izay azonareo onenana; fa ny TOMPO handefa mosary eto amin'ny tanin'i Israely, ary efa ho tonga izany ka haharitra fito taona.

² Dia niala teo ilay vehivavy ka nanao araka ny tenin'ilay olon'Andriamanitra taminy; ary lasa izy sy ny fianakaviany nifindra monina nandritra ny fito taona tany amin'ny tanin'ny Filistinina.

³ Nony afaka fito taona dia nody avy tany amin'ny tanin'ny Filistinina ravehivavy ka nangataka hihaona amin'ny mpanjaka mba hitaky ny tranony sy ny taniny.

⁴ Tamin'izay kosa ny mpanjaka dia niresaka tamin'i Gehazy mpanompon'i Elisa. Nangatahiny izy mba hilaza aminy izay zava-dehibe rehetra nataon'ny mpaminany.

⁵ Raha mbola notantarain'i Gehazy tamin'ny mpanjaka ny amin'ilay zaza maty izay novelomin'i Elisa, dia indro tonga nitaky ny tranony sy ny taniny tamin'ny mpanjaka ilay vehivavy. Ary hoy i Gehazy: Io ilay vehivavy sy ny zanany izay novelomin'i Elisa indray, ry andriamanjaka!

⁶ Dia nanontanian'ny mpanjaka ilay vehivavy, ka nitantara ny zava-drehetra. Ary nasain'ny mpanjaka nokarakarain'ny manamboninahitra iray ny raharahan-dravehivavy, ka hoy izy: Avereno aminy avokoa ny fananany rehetra ary onero ny vokatry ny taniny manomboka amin'ny andro nandaozany azy ka mandraka ankehitriny.

⁷ Indray andro dia tonga tany Damasy i Elisa. Narary i Bena-Hadada mpanjakan'i Siria tamin'izay; ary rehefa nisy nilaza taminy fa ao an-tanana ilay olon'Andriamanitra,

⁸ dia hoy izy tamin'i Hazaela: Mitondra fanomezana ka mandehana mihaona amin'i Elisa; dia asaivo manontany ny TOMPO izy raha toa ka ho sitrana amin'izao aretiko izao ihany aho.

⁹ Dia lasa nihaona tamin'i Elisa i Hazaela nombam-panomezana nentin'ny rameva efapolo, dia izay zava-tsoa isan-karazany tao Damasy. Rehefa tonga izy, dia nitsangana teo anatrehan'ny mpaminany sady nanao hoe: I Bena-Hadada, mpanoa anao sady mpanjakan'i Siria, no naniraka ahy hankaty aminao mba hanontany anao raha ho sitrana amin'izao aretina izao ihany izy.

¹⁰ Ka hoy ny navalin'i Elisa: Mandehana lazao izy fa ho sitrana marina tokoa! Kanefa ny TOMPO efa nanambara tamiko fa ho faty izy.

¹¹ Dia nifantoka fijery sy ankona endrika ilay olon'Andriamanitra; avy eo izy vao nitomany.

¹² Fa nanontany azy i Hazaela hoe: Nahoana ianao no mitomany, tompoko? Ka hoy ny navalin'i Elisa: Satria fantatro ny ratsy izay hataonao amin'ny Israelita: hodoranao ny tananamimandany; hovonoinao ho faty amin'ny sabatra ny tanorany, homontsaninao ny ankizikeliny, ary hotatahinao kibo ny vehivavy bevohoka eo aminy.

¹³ Dia hoy i Hazaela: Fa zinona moa ity tenako tsy manam-pahefana sady bitika ity no dia hahavita zavatra toy izany? Ary i Elisa namaly hoe: Efa nambaran'ny TOMPO tamiko fa ho mpanjakan'i Siria ianao.

¹⁴ Dia nandao an'i Elisa i Hazaela ka niverina tany amin'ny tompony izay nanontany azy hoe: Ahoana hoy i Elisa taminao? Hoy kosa ny navalin'i Hazaela: Nilaza tamiko izy fa ho sitrana tokoa ianao.

¹⁵ Nony ampitso anefa, dia naka bodofotsy anankiray i Hazaela; natsobony tao anaty rano izany ka nasarony ny tavan'i Bena-Hadada hanempotra azy. Dia maty ny mpanjaka, ary i Hazaela no nanjaka nandimby azy.

¹⁶ Tamin'ny taona fahadimy nanjakan'i Jorama zanakalahin'i Ahaba sady mpanjakan'i Israely no tonga mpanjakan'i Joda i Jorama zanakalahin'i Josafata, na dia mbola mpanjakan'i Joda aza i Josafata. Feno 32 taona izy fony vao nanjaka,

¹⁷ ary naharitra valo taona no nanjakany tao Jerosalema.

¹⁸ Ny toetran'ireo mpanjakan'i Israely no narahiny, dia tahaka ny fanaon'ny taranak'i Ahaba, satria nanambady ny zanakavavin'i Ahaba izy ka nanao izay ratsy eo imason'ny TOMPO.

¹⁹ Tsy nandringana an'i Joda anefa ny TOMPO noho ny amin'i Davida mpanompony, izay efa nampanantenainy fa ny taranany dia hanjaka mandrakizay ao Jerosalema.

²⁰ Tamin'ny andron'i Jorama no nikomian'ny Edomita tamin'ny fahefana jodeanina ka nananganany mpanjaka ho azy.

²¹ Nankany Tsahira niaraka tamin'ny kalesiny rehetra manko i Jorama. Nony voahodidin'ny Edomita ny tenany mbamin'ireo komandin-kalesiny, dia voatery nitsoaka nanao latsaka alina tamin'ny Edomita; ary nandositra nankany an-dainy ny tafika jodeanina.

²² Hatreo dia nanohitra ny fahefana jodeanina ny Edomita mandraka androany. Tamin'izay fotoana izay koa no nikomian'ny tananan'i Libna.

²³ Ny sisa amin'ny tantaran'i Jorama ary koa ny zavatra hafa rehetra nataony dia voasoratra ao amin'ny boky milohateny hoe Asan'ireo mpanjakan'i Joda.

²⁴ Rehefa lasa nodimandry any amin'ny razany i Jorama, dia nalevina tao amin'ny fasam-pianakaviany tao an-tananan'i Davida; ary i Ahazia zanany lahy no nanjaka nandimby azy.

²⁵ Tamin'ny taona faha-12 nanjakan'i Jorama zanakalahin'i Ahaba sady mpanjakan'i Israely no tonga mpanjakan'i Joda i Ahazia zanakalahin'i Jorama.

²⁶ Feno 22 taona i Ahazia fony vao nanjaka, ary herintaona ihany no nanjakany tany Jerosalema. Hatalia no anaran-dreniny izay vavimatoan'i Homry mpanjakan'i Israely.

²⁷ Ny toetran'ireo taranak'i Ahaba no narahin'i Ahazia; ka nanao izay ratsy eo imason'ny TOMPO tahaka ny nataon'ireo izy sady vinanton'ny taranak'i Ahaba ihany.

²⁸ Niara-dia tamin'i Jorama zanakalahin'i Ahaba izy mba hiady amin'i Hazaela mpanjakan'i Siria tany Ramota Gilehada kanjo naratran'ny Sirianina i Jorama.

²⁹ Ary niverina tao Jizrehela i Jorama mpanjaka mba hotsaboina tamin'ny ratra nahavoa azy tany Ramota, fony izy niady tamin'i Hazaela mpanjakan'i Siria. Dia nankany Jizrehela i Ahazia, zanakalahin'i Jorama sady mpanjakan'i Joda, mba hamangy an'i Jorama zanakalahin'i Ahaba noho izy narary.