2 Mpanjaka

Toko faha-4

¹ Indray andro dia nisy vehivavy vadina lehilahy anisan'ny andia-mpaminany, tonga nitaraina tamin'i Elisa nanao hoe: Maty ny vadiko mpanomponao, ary fantatrao fa nanaja ny TOMPO izy. Tonga ao anefa ny tompon-trosa haka ny zanako roa lahy mba handevoziny.

² Dia hoy i Elisa taminy: Inona ary no hataoko ho anao? Lazao ahy izay anananao ao an-trano. Fa hoy ny navalin'ilay vehivavy: Tsy manana na inona na inona aho afa-tsy ilomanitra indray mihosotra ihany.

³ Ary hoy indray i Elisa: Mandehana mindrana tavoara foana amin'izay mpiara-monina aminao rehetra, kanefa aza atao vitsy.

⁴ Rahefa izany, dia mihidia aman-trano miaraka amin'ireo zanakao; koa aidino amin'ireo tavoara rehetra ireo ny ilomanitra, ary atokano izay feno.

⁵ Dia lasa ravehivavy nihidy aman-trano niaraka tamin'ny zanany; ary ireto zanany nanolotra ny tavoara, fa izy kosa nameno izany.

⁶ Rehefa elaela, dia hoy ravehivavy tamin'ny zanany anankiray: Mbola itondray tavoara hafa koa aho. Kanjo feno avokoa ireo tavoara teo, ka hoy izy hoe: Tsy misy intsony! Dia tankina teo koa ny ilomanitra.

⁷ Ary lasa ravehivavy nitantara ny zava-nitranga tamin'ilay olon'Andriamanitra, izay nilaza taminy hoe: Andeha amidio izany ilomanitra izany hanefanao ny trosan'olona; fa izay vola sisa kosa dia hivelomanao sy ireo zanakao.

⁸ Indray andro dia nandalo tao Sonema i Elisa. Nisy vehivavy mpanankarena iray tao izay nanery azy mafy mba hisakafo ao aminy. Ary isaky ny mandalo eo izy, dia nivily ao aminy mba hisakafo.

⁹ Ary hoy izany vehivavy izany tamin'ny vadiny: Fantatro fa tena mpaminany masin'Andriamanitra iny lehilahy mpankato amintsika matetika iny.

¹⁰ Tokony hanaovantsika efitrano kely ao ambony tafo marin-tampona ao ka hasiantsika farafara sy latabatra sy seza ary fitoeran-jiro ho azy. Ao no hipetrahany isaky ny mandalo eto amintsika.

¹¹ Indray andro dia tonga tao amin-dry zareo i Elisa ary niakatra tany amin'ilay efitrano ambony ka natory tao.

¹² Dia hoy izy tamin'i Gehazy mpanompony: Antsoy ilay vehivavy sonemita. Rehefa nantsoiny ravehivavy, dia tonga teo anoloan'ilay efitrano;

¹³ ary niangavian'i Elisa i Gehazy hilaza aminy hoe: Efa nisahirana betsaka taminay ianao; koa inona kosa no hataonay ho anao? Tianao ve ny hiresahanay anao amin'ny mpanjaka na amin'ny filohan-tafika? Dia hoy ny navaliny: Tsia! Fa eto anivon'ny mpiray foko amiko aho, ka monina feizay.

¹⁴ Ka hoy i Elisa: Fa mba inona ary no hatao ho azy? Dia namaly i Gehazy hoe: Indrisy fa tsy manan-janaka izy sady efa antitra ny vadiny.

¹⁵ Ary hoy i Elisa: Antsoy indray ary izy. Rehefa nantsoiny ravehivavy, dia tonga teo anoloan'ny varavaran'ilay efitrano

¹⁶ ary nilazan'i Elisa hoe: Amin'ny herintaona tahaka izao dia hitrotro zazalahy ianao. Fa hoy kosa ravehivavy: Tsia, tompoko o! Olon'Andriamanitra ianao ka aza mandainga amiko!

¹⁷ Bevohoka tokoa anefa ravehivavy; ka nony niherina ny taona, dia tera-dahy izy araka ny fotoanandro nolazain'i Elisa taminy.

¹⁸ Nihalehibe ny zaza; koa indray andro dia nankany amin-drainy tany am-pijinjam-barimbazaha izy,

¹⁹ ary vetivety eo dia niteny taminy hoe: Dada o! Maharary ahy loatra izany lohako izany! Ary hoy ny rainy tamin'ny mpanompony anankiray: Ento haingana any amin-dreniny izy.

²⁰ Dia notrotroin'ilay mpanompo izy ka nentiny ho any amin-dreniny; ary nampofoin-dravehivavy izy mandra-pitataovovonan'ny andro, dia maty.

²¹ Ary niakatra tao amin'ny efitranon'i Elisa ravehivavy ka nampandry ny zaza teo am-parafarany; dia nakatony ny varavarana. Avy teo izy lasa

²² ka niantso ny vadiny nanao hoe: Mba andefaso mpanompo iray miaraka amin'ny borikivavy iray aho; fa handeha faingana ho any amin'ilay olon'Andriamanitra aho, dia hiverina indray.

²³ Fa hoy ny vadiny taminy: Nahoana ianao no hankany aminy anio, nefa tsy fetin'ny tsinam-bolana na sabata akory ny andro? Hoy kosa ny navaliny: Aza manahy ianao!

²⁴ Dia nanisy lasely ny borikivavy izy ary niteny tamin'ny mpanompony hoe: Andeha tariho ny boriky, ka aza mijanona mihitsy raha tsy baiko avy amiko.

²⁵ Ary lasa ravehivavy nankany amin'ilay olon'Andriamanitra any an-tendrombohitra Karmela. Raha vao tazan'ilay olon'Andriamanitra avy lavitra ravehivavy, dia hoy i Elisa tamin'i Gehazy mpanompony: Jereo fa ilay vehivavy sonemita iry.

²⁶ Mba mihazakazaha ianao hitsena azy ary anontanio raha toa ka tsara ihany izy sy ny vady aman-janany. Dia namaly an'i Gehazy ilay vehivavy fa tsara ihany izy mianakavy.

²⁷ Rehefa tonga teo akaikin'i Elisa teo an-tendrombohitra anefa izy, dia niantoraka teo an-tongony; nanatona hampiala azy i Gehazy, saingy nitenenan'i Elisa hoe: Aoka ihany izy, fa vonton'alahelo; ary nafenin'ny TOMPO ahy ny anton'izany fa tsy nampahafantariny ahy.

²⁸ Tamin'izay indrindra, dia hoy ilay vehivavy: Moa nangataka zanaka taminao va aho, tompoko? Tsy efa nilazako ve ianao hoe: Aza mampanantena volana ahy.

²⁹ Hoy i Elisa tamin'i Gehazy: Mivonona ianao handeha! Raiso ny tehiko maha mpaminany ahy, dia mankanesa any Sonema. Raha mifanena amin'olona ianao eny an-dalana, dia aza mijanona hiarahaba azy; ary raha misy miarahaba anao, dia aza mamaly akory. Rehefa mby any ianao, dia atehefo eo amin'ny tavan'ny zaza ny tehiko.

³⁰ Fa hoy ny renin'ny zaza tamin'i Elisa: Velona ny TOMPO ary velona ny ainao, ka manizingizina aho fa tsy hiala eto raha tsy tafaraka aminao. Ary lasa tokoa ilay olon'Andriamanitra ka niara-dia taminy.

³¹ Efa tonga talohany kosa i Gehazy ka nametraka ny tehin'i Elisa teo amin'ny tavan'ny zaza, nefa tsy nisy feo na koa fihetsehana. Dia niverina tany amin'ny mpaminany izy ka tojo azy ary nilaza taminy hoe: Tsy nahatsiaro akory ny zaza.

³² Rehefa tonga tao an-trano i Elisa, dia mbola mivalampatra eo ambony farafara ilay zaza maty.

³³ Dia niditra izy ka nihidy aman-trano niaraka tamin'ny zaza ary nivavaka tamin'ny TOMPO.

³⁴ Dia nandry teo ambonin'ny zaza izy ka vava tandrifin'ny vavany sy maso tandrifin'ny masony ary tanana tandrifin'ny tanany. Koa raha mbola nijanona teo amboniny izy dia nihanafana ny tenan'ilay zaza.

³⁵ Nitsangana i Elisa ka niasa dia eran-trano ary niverina niampatra indray teo ambonin'ny zaza. Tampoka teo anefa dia nievina impito ilay zaza ka nihiratra.

³⁶ Nantsoin'i Elisa i Gehazy ka nitenenany hoe: Ndeha antsoy ilay Sonemita! Dia laza izy niantso azy; koa nony nankao amin'i Elisa ravehivavy dia nilazany hoe: Raiso ny zanakao.

³⁷ Dia nandroso ravehivavy ka niantoraka teo an-tongotry ny mpaminany sady niankohoka nitehi-tany ho fanajana azy. Noraisiny ny zanany ary lasa izy nivoaka ny efitrano.

³⁸ Niverina nankany Gilgala i Elisa. Nanjakan'ny mosary ny tany tamin'izay ka novoriny teo anatrehany ny andia-mpaminany; sady hoy izy tamin'ny mpanompony: Ataingeno eo ambony fatana ny vilany lehibe ary manaova lasopy ho an'ny andia-mpaminany.

³⁹ Dia lasa hitsongo anana tany an-tsaha ny mpaminany iray, ka nahita zava-maniry mandadina niotazany voatangom-bazaha; dia nahangona iray trotroana tamin'izany izy. Ary nony tafaverina izy, dia notetehiny madinika ireo ka narotsany am-bilany fa tsy nisy nahafantatra.

⁴⁰ Rehefa naroso anefa izany lasopy izany, ka samy nanandrana ny olona, dia nitaraina hoe: Voapoizina ny lasopy, ry olon'Andriamanitra o! Ary tsy azo nohanina tokoa izany.

⁴¹ Fa niangavian'i Elisa kosa ny hitondrana lafarinina. Dia nandrotsaka izany tao am-bilany izy, vao niteny hoe: Andoary amin'izay ny olona ary aoka izy hihinana! Koa nanjary fihinana indray ny tao am-bilany.

⁴² Nisy lehilahy tonga avy any Bahala-Salisa izay nitondra mofo orza roapolo sy varim-bazaha iray kitapo santa-bokatra ho an'ity olon'Andriamanitra. Dia nilazan'i Elisa ny mpanompony mba hizara ireo hohanin'ny olona;

⁴³ fa hoy kosa ilay mpanompony: Fomba ahoana no hamahanako olona zato amin'ireo? Ary hoy indray i Elisa: Zarao amin'ny olona rehetra ireo hohaniny, satria izao no lazain'ny TOMPO: Hihinana sahaza ny olona ary mbola hisy aza sisa tsy lany.

⁴⁴ Dia notsinjarain'ilay mpanompo tamin'ny olona ny mofo ka samy nihinana avokoa ny tsirairay ary mbola nisy aza sisa tsy lany araka ny voalazan'ny TOMPO.