1 Mpanjaka

Toko faha-16

¹ Ary nisy tenin'ny TOMPO tamin'i Jeho mpaminany zanakalahin'i Hanany, dia hafatra ny amin'i Bahasa manao hoe:

² Nasandratro avy amin'ny vovoka ianao ka nataoko ho filohan'i Israely vahoakako, kanefa dia ny fitondrantenan'i Jerobohama no nizoranao ary ilay Israely vahoakako nampanotanao ka nampahatezitra Ahy tamin'ny fahotany.

³ Noho izany, hofongorako ny tenanao sy ny fianakavianao ka hataoko tahaka ny fianakavian'i Jerobohama zanakalahin'i Nebata.

⁴ Koa ny taminganao izay maty ao an-tanana dia hohanin'ny alika; ary izay maty any an-tsaha kosa dia hohanin'ny voro-manidina.

⁵ Ny sisa amin'ny tantaran'i Bahasa ary koa ny zavatra hafa nataony sy ny herimpo nasehony dia voasoratra ao amin'ny boky milohateny hoe Asan'ireo mpanjakan'i Israely.

⁶ Rehefa lasa nodimandry any amin'ny razany izy, dia nalevina tao Tiritsa; ary i Ela zanany lahy no nanjaka nandimby azy.

⁷ Ny nitenenan'ny TOMPO an'i Bahasa sy ny fianakaviany, tamin'ny alalan'i Jeho mpaminany zanakalahin'i Hanany, dia noho ireto antony roa ireto: voalohany satria nanao izay ratsy eo imason'ny TOMPO i Bahasa sy ny fianakaviany, ka nampahatezitra Azy tamin'ny asan'ny tanany sady tonga tahaka an'i Jerobohama sy ny fianakaviany; ary faharoa satria naringan'i Bahasa ny taranak'i Jerobohama.

⁸ Tamin'ny taona faha-26 nanjakan'i Asa mpanjakan'i Joda no tonga mpanjaka tamin'i Israely i Ela zanakalahin'i Bahasa; ary naharitra roa taona no nanjakany tao Tiritsa.

⁹ Fa nioko hamely azy i Zimry manamboninahiny sady komandin'ny antsasaky ny mpitondra kalesy. Koa fony i Ela nisotro sy nimamo tao Tiritsa tao an-tranon'i Aretsa filohan'ny tandapa,

¹⁰ dia niditra i Zimry ka namono nahafaty azy tamin'ny taona faha-27 nanjakan'i Asa mpanjakan'i Joda; ary izy no nanjaka nandimby an'i Ela.

¹¹ Ary vantany vao nanjaka i Zimry ka nipetraka teo amin'ny sezafiandrianany, dia naringany avokoa ny fianakavian'i Bahasa, ka tsy nasiany niangana rehefa mety ho lehilahy, na tamin'ny havany izany na tamin'ny sakaizany;

¹² naringan'i Zimry avokoa ny fianakavian'i Bahasa araka ny teny nolazain'ny TOMPO tamin'ny alalan'i Jeho mpaminany.

¹³ Izany no vokatry ny fahotana vitan'i Bahasa sy i Ela zanany, dia izay nataon'izy mianaka sady nampanaoviny an'i Israely ka nampahatezitra ny TOMPO Andriamanitr'i Israely tamin'ny sampiny.

¹⁴ Ny sisa amin'ny tantaran'i Ela ary koa ny zavatra hafa rehetra nataony dia voasoratra ao amin'ny boky milohateny hoe Asan'ireo mpanjakan'i Israely.

¹⁵ Tamin'ny taona faha-27 nanjakan'i Asa mpanjakan'i Joda no tonga mpanjakan'i Israely i Zimry ary fito andro ihany no nanjakany tao Tiritsa. Tamin'izay ny tafik'i Israely dia nanao fahirano an'i Gibetona izay voatanan'ny Filistinina.

¹⁶ Ren'ny miaramila mpanao fahirano fa nikomy tamin'ny mpanjaka i Zimry sady efa nahafaty azy aza; koa androtriny ihany teo an-tobiny teo ny tafik'i Israely manontolo dia nanangana an'i Homry filohany ho mpanjakan'i Israely.

¹⁷ Dia niala tao Gibetona i Homry sy ny tafiny manontolo ka nanao fahirano an'i Tiritsa.

¹⁸ Rehefa hitan'i Zimry fa azo ny tanana, dia lasa izy niditra tao amin'ny tilikambo nisy ny efitranon'ny mpanjaka; nodorany io efitrano io, ka dia niara-devona taminy tao izy.

¹⁹ Izany no vokatry ny fahotana vitan'i Zimry, fony izy nanao izay ratsy eo imason'ny TOMPO satria nizorany ny fitondrantenan'i Jerobohama sy ny fahotana izay nataony sady nampanaoviny an'i Israely.

²⁰ Ny sisa amin'ny tantaran'i Zimry ary koa ny fikomiana nataony dia voasoratra ao amin'ny boky milohateny hoe Asan'ireo mpanjakan'i Israely.

²¹ Taorian'ny nahafatesan'i Zimry, dia nizara roa ny vahoakan'i Israely: ny antsasany nomba an'i Tibny zanakalahin'i Ginata ka te hampanjaka azy, ary ny antsasany kosa nanaraka an'i Homry.

²² Farany anefa dia resin'ny mpomba an'i Homry ny mpomba an'i Tibny zanakalahin'i Ginata. Dia maty i Tibny, ary i Homry no tonga mpanjaka.

²³ Tamin'ny taona faha-31 nanjakan'i Asa mpanjakan'i Joda no tonga mpanjakan'i Israely i Homry; ary naharitra 12 taona no nanjakany ka ny enina tamin'izany dia tao Tiritsa.

²⁴ Dia novidiny volafotsy fito kilao tamin'i Semera ny havoanan'i Samaria ka nanorenany tanana teo an-tampony; ary nataony koa hoe Samaria ny anaran'izany tanana izany araka ny anaran'i Semera tompon'ilay havoana.

²⁵ Fa nanao izay ratsy eo imason'ny TOMPO i Homry, eny, nanao ratsy mihoatra noho izay rehetra teo alohany aza;

²⁶ satria nizorany avokoa ny fitondrantenan'i Jerobohama zanakalahin'i Nebata sy ny fahotana izay nampanaoviny an'i Israely ka nampahatezitra ny TOMPO Andriamanitr'i Israely tamin'ny sampiny.

²⁷ Ny sisa amin'ny tantaran'i Homry ary koa ny zavatra hafa nataony sy ny herimpo nasehony dia voasoratra ao amin'ny boky milohateny hoe Asan'ireo mpanjakan'i Israely.

²⁸ Rehefa lasa nodimandry any amin'ny razany izy, dia nalevina tao Samaria; ary i Ahaba zanany lahy no nanjaka nandimby azy.

²⁹ Tamin'ny faha-38 taona nanjakan'i Asa mpanjakan'i Joda no tonga mpanjaka tamin'i Israely i Ahaba zanakalahin'i Homry; ary naharitra 22 taona no nanjakany tamin'i Israely tao Samaria.

³⁰ Ary izy io dia nanao izay ratsy eo imason'ny TOMPO mihoatra noho izay rehetra teo alohany.

³¹ Tsy vitan'ny hoe nizotra tamin'ny fahotan'i Jerobohama zanakalahin'i Nebata izy, fa mbola nanambady an'i Jezebela zanakavavin'i Etbahala mpanjakan'ny Tsidonianina sy nanompo an'i Bahala ary niankohoka teo anatrehany.

³² Tany Samaria aza dia manao tempoly ho an'i Bahala izy ka nanangana alitara

³³ sy nametraka tsatokazo fanajana an'i Asera tao; koa nampahatezitra ny TOMPO Andriamanitr'i Israely izy mihoatra noho ny mpanjakan'i Israely rehetra talohany.

³⁴ Tamin'ny andro nanjakan'i Ahaba no nanorenan'i Hiela avy any Betela an'i Jerikao; ka ny ain'i Abirama lahimatoany no sandan'ny nametrahany ny fototra, ary ny ain'i Segoba faralahiny no sandan'ny nametrahany ny vavahady, araka ny teny izay nolazain'ny TOMPO tamin'ny alalan'i Josoa zanakalahin'i Nona.